Bugun yurtimiz mustaqillikka erishganiga 34 yil to‘ldi. Shu davr mobaynida xalqimiz hayotida amalga oshirilgan ulkan islohotlar, jamiyatimizda kuzatilayotgan farovonlik va taraqqiyot — barchasi davlatimiz rahbarining oqilona siyosati, yurtimizdagi tinchlik va xalqimiz mehnatsevarligining yorqin samarasi hisoblanadi.

Men, Xojiqishloq mahallasi nuroniysi sifatida, bu olamshumul ne’matlar uchun shukrona aytaman. Bugun mahallamizda yangi yo‘llar qurilmoqda, obodonlashtirish ishlari amalga oshirilmoqda, zamonaviy xizmat ko‘rsatish markazlari ishga tushmoqda. Yoshlarimiz uchun bilim olish, sport va san’at bilan shug‘ullanish, zamonaviy texnologiyalarni o‘zlashtirish imkoniyatlari kengaymoqda.

Shunday sharoitda hayot kechirayotganimiz uchun Allohga hamdu sanolar aytamiz, davlatimiz rahbariga esa chuqur minnatdorlik bildiramiz.

Shukronasi shuki, yurtimiz tinch, xalqimiz xotirjam, kelajakka ishonchimiz mustahkam. Biz nuroniylar ham yoshlarimizni vatanparvar, halol va ma’naviyatli insonlar qilib tarbiyalashga, mahalla va yurtimizning ravnaqi uchun xizmat qilishga hamisha tayyormiz.

Jakparov Ismoiljon,
Xojiqishloq MFY nuroniysi