Farg‘ona tumani axborot-kutubxona markazi hamda O‘zbekiston Liberal-demokratik partiyasi (O‘zLiDeP) Farg‘ona tumani bo‘limi o‘rtasida o‘zaro hamkorlikni mustahkamlash maqsadida hamkorlik memorandumi imzolandi.

Mazkur memorandum kitobxonlik madaniyatini keng targ‘ib qilish, aholining siyosiy va huquqiy ongini oshirish, yoshlar va keng jamoatchilik o‘rtasida ma‘naviy-ma‘rifiy tadbirlarni yanada ko‘paytirish, shuningdek, o‘zaro tajriba almashinuvini yo‘lga qo‘yish kabi qator dolzarb yo‘nalishlarni qamrab oladi.

Hamkorlik doirasida taraflar turli ijodiy uchrashuvlar, seminarlar, davra suhbatlari va kitob taqdimotlari tashkil etishni rejalashtirmoqda. Bu esa nafaqat kitobxonlar safini kengaytirishga, balki jamiyatda ma‘rifat va bilimga bo‘lgan qiziqishni yanada oshirishga xizmat qiladi.