1. Бош сахифа
2. Янгиликлар

РИШТОН КУЛОЛЧИЛИК МАҲСУЛОТЛАРИ “СЕҲРЛИ ДИЁР”НИ ЗАБТ ЭТИШГА ТАЙЁР

×

Уста кулол Шокиржон Аҳмаджонов раҳбарлигидаги “Мингбоши Керамик” кулолчилик кластери янги марраларни забт этишда давом этмоқда. Шу кунга қадар ушбу кластер маҳсулотлари Марказий Осиё ва Европанинг 10 га яқин мамлакатига экспорт қилинаётгаанди. Ҳамкор давлатлар сони яна биттага кўпайди.

Изланувчан ва тиниб-тинчимас Шокиржон Аҳмаджонов янги ҳамкорларни излаш, кластер фаолиятини ривожлантириш борасида кенг кўламдаги ишларни амалга ошириб келмоқда. Кечаги кун “Мингбоши Керамик” кулолчилик кластери тарихидаги ёрқин из қолдирди. Аниқроғи, Риштон кулолчилик маҳсулотларини “Сеҳрли диёр” бўлмиш – АҚШга экспорт қилиш имконияти пайдо бўлди.

 “Мингбоши Керамик” кулолчилик кластери биносида “Мингбоши Керамик” кулолчилик кластери оилавий корхонаси ҳамда Американинг “DIAMOND (USA) INC” компанияси томонидан 5 млн. доллар миқдоридаги шартнома имзоланди.

Шартнома имзолаш жараёнида туман ҳокими С. Солиев, “Мингбоши Керамик” кулолчилик кластери оилавий корхонаси раҳбари Ш. Аҳмаджонов, “DIAMOND (USA) INC” компанияси директори Самимуллохлар иштирок этишди.

- Кулолчилик маҳсулотларимизнинг географияси кенгайиб бораётганидан хурсандман. Риштон туманидан хорижий мамлакатларга экспорт қилинаётган маҳсулотларни кўрсам, жуда хурсанд бўламан. Биз ҳар доим хорижлик тадбиркорлар билан ҳамкорлик қилишга тайёрмиз, деди туман ҳокими.

- Очиғини айтсам, Риштон кулолчилик маҳсулотлари мени ўзига ром этди. Айниқса, бу маҳсулотларнинг фақат қўл меҳнати орқали тайёрланиши унинг жозибадорлигини оширмоқда. Мен “Мингбоши Керамик” кулолчилик кластери оилавий корхонаси ҳамкорлик қилаётганимдан хурсандман, деди “DIAMOND (USA) INC” компанияси директори Самимуллох. 

Айни дамда Риштон кулолчилик маҳсулотларини АҚШга юбориш ишлари бошланган. Уйлаймизки, ушбу ҳамкорлик узоқ ва самарали бўлиб, Риштон кулолчилик маҳсулотлари дунё мамлакатларини лол қолдиришда давом этади.